مقابلة مع الفنان / محمد سعيد


س1 : محمد عرفنا بنفسك

الاسم : محمد سعيد صبري السن : 24 سنة. انا خريج كلية التجارة عام 2011. عايش في قرية قريبة من الزقازيق مع عيلتي. القرية دي اسمها صبيح ولها معزة كبيرة جدا عندي .. خضرة حواليك في كل مكان فاكيد هتحبها غصب عنك بحب العربيات جدا وبعتبر السواقة فن وهواية زي الرسم بالظبط. وبحب اقرا كتير عنها وعن التفاصيل الصغيرة اللي ميعرفهاش ناس كتير

س2 : ماذا عن بدايتك في المجال ؟

بدايتي في المجال كانت غريبة شوية. ممكن تعتبرها صدفة بس صدفة من احسن الصدف اللي ممكن تحصل لاي حد شفت ايفينت لجرنال الدستور سنة 2010 على الفيس بوك ولفت نظري اسم عمرو الصاوي اللي كان موجود في الجرنال وقتها. ضفته عادي جدا. وقتها مكانش الفيس بوك مبتذل أوي زي دلوقتي. المهم قلتله اني برسم بس على خفيف ومش بانتظام.  قاللي ارسم اتنين قاعدين على قهوة. ومن هنا كانت البداية بدأت اشتغل في كاريكاتير المواقف على قدي جدا. مجرد فكرة في دماغي وبعبر عنها بأسلوبي. بعدين شفت رسمة لصديق ليا راسم فيها هيلينا كارتر كاريكاتير. عجبني اوي الستايل والطريقة وقلت هو ده اللي عاوز اركز عليه ذاكرت تشريح وقعدت اتمرن كل يوم وكلمت ناس كتير عرب واجانب اخد منهم النصيحة واعرف منهم ايه اللي مفروض اشتغل عليه اكتر عشان مستوايا يتحسن بعد كده جبت تابلت وبدأت اشتغل اكتر وجرب حاجات جديدة. بعدها ب 6 شهور جالي شغل في شركة دعاية ومن ساعتها وانا شغال في المجال ده

muhammed-saeed Artwork1muhammed-saeed Artwork2muhammed-saeed Artwork3

س3 : حَدث متابعي المدونة علي نوع الفن الذي تقدمه ؟ وبمن تأثرت ؟ 

نوع الفن اللي بقدمه هو البورتريه الكاريكاتوري. هو عبارة عن وجهة نظرك انت كرسام بورتريه بتخرجها في شغلك. او انت شايف ايه اللي ممكن يطلع من الشخصية دي في بورتريه وتلعب على الحتة دي . الفكرة كلها مش انك تضحك الناس على الشخصية اللي بترسمها. الفكرة انك بتركيزك على ملامحه الاساسية وخصائصه بتقدر تبرز اهم حاجات في شخصيته وهي دي اللعبة اهم الناس اللي اتاثرت بيهم معظمهم اجانب. وفي رسامين عرب ومصريين jason seiler .. Jeff Stahl .. Jota Leal .. Anthony Geoffry

س4 : لاحظت تركيزك علي البورتيرات الشخصية. لماذا ؟

تركيزي على البورتريهات عشان دي حاجة بعملها من اول ما بدأت وبحب اشتغلها بس كده . لكن دلوقتي بحاول اجرب في اي حاجة تانية لاني ايقنت اني مش هاكل عيش من الموضوع ده 🙂

س5 : هل تجد صعوبة في توظيف ما تقدمه في مجال الاعلان و الاعمال التجارية ام ان الامر يَسير ؟

هو الوضوع صعب شوية يتوظف في مجال الدعاية بسبب ان الناس لسه مجربتش السكة دي. لكن انا لو خدت فرصة اني اطبق ده عندي احساس اني هعمل حاجة كويسة ومختلفة وجديدة

muhammed-saeed Artwork4muhammed-saeed Artwork5Fouadmuhammed-saeed Artwork8

س6 : وضح لنا خطوات عملك في اي بورتريه ؟

خطواتي في شغل البورتريه بسيطة جدا ومش صعبة. هي مسالة تعود يعني هتلاقي الدنيا صعبة شوية في الاول لكن بعد كده هتلاقي نفسك بتعمل حاجات انت مكنتش متخيل انك ممكن تطلعها في بورتريه لو هرسم شخصية فنان او اي حاجة تانية بحاول ادور على فيديوهات ليه واتفرج على كذا كادر للوش والخصائص بتاعته. بعد كده ببدأ اعمل كذا سكتش سريع ومش لازم يبقى شبهه اوي بس اشوف هقدر اطلع منه بايه .. وبعد كده بعمل سكتش تاني وببدأ ادرس الملامح والنسب والحاجات دي وانا شغال عادي جدا. السكتش من اهم المراحل في انك تبني حاجات وتطلعها لانه بيخليك تاخد على الحاجة اللي قدامك وتتعرف عليها اكتر مما بيسهل عليك عملية التلوين بعد كده

س7 : ما هي اخر المشاريع التي شاركت في تصميمها ؟

اخر حاجة .. اني شاركت في عمل تخيل لشخصية فؤاد المهندس اللي ظهرت في حملة بيبسي الاخيرة. اي نعم متاخدتش بدقة لكن انا فخور جدا اني شاركت ولو بجزء ضئيل جدا في حاجة مهمة زي دي

س8 : ما هي اكثر الصعوبات التي تواجهك في هذا المجال ؟

الصعوبات هي الصور اللي نقائها مش عالي او جودتها وحشة  الموضوع ده كان صعب جدا في الاول لكن دلوقتي في حلول لان الموضوع مع الوقت بيبقى اسهل

س9 :هل من نصيحة تقدمها لمحبي المجال الجدد ؟

نصيحة للناس اللي شغالين جديد. ذاكر تشريح كويس ومنظور واتفرج على شغل كتير ومتنوع. وحاول تاخد سكتش معاك في كل حتة وترسم اي حاجة في اي وقت واي حتة. الموضوع ده هيساعدك جدا

لمتابعة الفنان Behance –Facebook 

Comments

comments

Powered by Facebook Comments

+ There are no comments

Add yours