مقابلة مع المصمم مرشدي

فنان اخر من الذين اتخذوا زمام المبادرة و سلك خط الاعمال الفنية الحرة غير المقيدة بتوجيهات زبون او عميل. تابعت الكثير من اعماله و تعجبت سلوكه هذا المسار لعلمي بصعوبته و قلة بل ندرة عائده المادي علي المدي القريب.

مرشدي شاب من مواليد التسعينات لم يتلقي اي ورش عمل كورسات بالمجال يرفض وصف نفسه بمصمم او رسام بل يفضل فنان ليس غرورا لكن لعدم تقيد انتاج اعماله بمسمي وظيفي.

يقول عن نفسه ”  بتبهرني الحاجة الحلوة. علشان كدا دايما بحاول اي حاجة اعملها تكون ممتعة لاي عين تشوفها. ده باختصار اللي بحب اعمله. بحب اجرب كتير خامات مختلفة، اساليب مختلفة، باختصار بحاول اكتشف نفسي. مبحبش افضل ف مكان واحد او احصر نفسي في حته واحدة

س1 : عرفنا بنفسك ؟

اسمي الكامل : احمد السعيد علي المرشدي / 25 سنة/ من ديرب نجم  محافظة الشرقية مواليد1990 خريج كلية اداب قسم اعلام و صحافة  دراستي كانت صحافة و خريج 2011

س2 : تحدث معانا بدايتك الفنية و الدراسية ؟

مش فاكر بالضبط بدأت امتى تحديدا, بس تقريبا كان عمري 6 سنين اول ما بدات اشخبط وارسم واجرب. و عن بدايتي او شغلي وكل حاجة بعملها ممكن اسميها تجربة. تجربة شخصية جدا لاني مؤمن ان الفن عادة هو تجربة و المتعة ان الشخص يجرب ويكتشفها لحد ما بيكون شخصيته .مكنتش و انا صغير اجتماعي اوي . كانت علاقتي بالالوان والشخبطة اكتر. و كان اللي بيشجعني اني اكمل ان اللي حوالي كانوا دايما بيقولوا ان رسمي حلو سواء مدرسين او اقارب .

فضلت كدا لحد الجامعة وانا بجرب وبشتغل بخامات مختلفة . يعني اشتغلت بالرصاص والجاف والفحم و الزيت و الصلصال و نحت سواء طين او خشب و كنت بشتري كتب تشريح و ظل واتفرج واجرب و بعدين انتقلت لفترة ارسم على الزجاج و بعدين اتجهت للنحت. الموضوع مكنش مرتبط بالتعليم خالص. كان مرتبط بالشغف. حبيت اجرب كل حاجة ممكن اطلع منها حاجة شكلها حلو. من الحاجات اللى شجعتني جدا ف فترة ما من حياتي. كان سني تقريبا وقتها 16 سن .

وكنت وقتها شغال بالزيت. فيه ناقدة شافت شغلي وقالتلي. عظيم انك يبقى ليك شخصية واضحة جدا ف شغلك وانت ف السن دا . في فنانين كتير بياخدوا وقت كبير لحد مايظهر ليهم شخصية خاصة بيهم. كنت سعيد جدا بالكلام دا. لحد ما حسيت اني مش عايز احدد نفسي في مكان واحد و لسه قدامي كتير. بالمناسبة وقتها كنت برسم زيت بس بصوابعي.

س3 : عند تصفحي اغلب اعمالك اراها مزيج من الرسم و التصميمات الدعائية هل تعد نفسك مصمم ام رسام. و لماذا ؟

انا اتمنى اني ابقى فنان مش رسام او مصمم. لان الفنان دايما عنده حلول و بيقدر يرسم ويصمم لانه عينه بشكل عام بتكون حلوة بيقدر يعمل نسب كويسة و بيتعلم بسرعة و الملاحظة عنده كويسة جدا. ممكن تلاقي رسام بس مش كويس في التصميم او مصمم بس مبيعرفش يرسم. الفنان بيقدر يطلع عمل فني ممتع للعين و متكامل والوانه حلوة. 

س4بأي مدرسة فنية تأثرت ؟ و هل تركز في اعمالك أكثر علي الجانب الاعلاني ام الجانب الفني الرسومي فقط ؟

مدارس فنية كتير قريت فيها و اتفرجت على شغل كتير. بس بشكل عام انا بفضل البساطة في العمل الفني . بيبهرني الحاجة البسيطة و الصريحة بحب الفن المكسيكي بشكل عام . الوانه صريحة وواضحة. وبحب دييغو ريفيرا بشكل خاص و بركز على الجانب الفني اكتر. واوقات الجانب الاعلاني لو مهتم بالمقابل المادي 😀

س5 :  ماذا عن مسارك المهني ؟

عن بدايتي . كان في شهر ٦ – ٢٠١٣ دا كان يعتبر اول شغل ليا في شركة full time . كنت ux designer شغل خاص بتصميم touch devices apps . كان الشغل مفيد جدا ليا لانه خلاني اقوي في استخدام برامج زي الفوتوشوب و الاليستريتور. و خلاني اقدر الاحظ المقاسات بشكل دقيق. لان البيكسل الواحد بيفرق. بس بعد فترة حسيت اني متجه شوية للرسم اكتر من الموضوع دا. اتعلمت كتير بس حسيت ان دا مش مكاني. بعد كدا اشتغلت illustrator . و من وقتها بحاول اتعلم طرق و مهارات جديدة و ادمجها مع بعض علشان اقدر اطلع حاجة حلوة عن المسار المهني. ف مش مهتم بتدرج مهني معين او لقب او اي حاجة بالشكل دا .اكتر من اهتمامي بالحاجة اللي هعملها ف المكان دا .. الحمدلله بيجيلي دايما عروض من شركات اعلانات كبيرة و معروفة ف مصر . بس دايما ببص للموضوع بشكل مختلف شوية بس علي المدى البعيد فانا بفكر اسيب الشغل و اتفرغ لمشروع لسه معرفش ممكن يكون ايه. بس اكيد هيكون حاجة تسيطر علي واكون شغوف بيها. و أقدر اجمع فيه كل المهارات الي اعرفها و افتخر بيه يوم من الايام

س6 : عند تصميمك للشخصيات لاحظت بساطة خطوطها فهي عبارة عن كتل متزنة بشكل محكم و مع بساطة الخطوط فهي قريبة من ملامح الشخصية الأصلية. كيف تزن ذلك. افضل ان تحدثنا عن طريقة الرسم هذة و كيف يمكن اتقانها ؟

علشان ارسم شخصية بشكل بسيط جدا وف نفس الوقت تكون شبه الشخصية الحقيقة. فانا دايما بختار شخصيات تكون ملامحها واضحة ومختلفة وفيها حاجة مميزة . و بكدا ملامح بسيطة ممكن بسهولة ترسم الشخصية. ده غير انك لو عارف جوهر الشخصية هتقدر تطلع ملامحها بسهولة

س7 : لما لا توظف اعمالك لطرح لمناقشة قضية اجتماعية او سياسية عامة كحال رسامي الكاريكاتير ؟

مبعتبرش نفسي رسام كاريكاتير لو في قضية او حاجة حابب اتكلم عنها فبستخدم اكتر من طريقة ممكن رسم  او صورة او اي حاجة

س8 : شاهدت لوحاتك الفنية الاخيرة لفان جوخ و إدغار آلان. حدثنا عن هذة التجربة كيف جائت لك الفكرة الي التنفيذ. و لماذا لا تعرض هذا النوع من الاعمال في معرض او تقوم بتنفيذها لأشخاص عاديين حسب الطلب ؟

اولا انا بحب الشخصيتين جدا و فيه شخصيات كمان في الطريق و بفكر ف اني اجرب الصلصال في حاجات تانية كتير لسه .

الفكرة جاتلى لما لاقيت فيه فنانين برا بيستخدموه وبيطلعوا بيه شغل عظيم. فقولت ليه مرجعش استخدمه تاني. خاصة ان دي مش اول مرة استخدم الصلصال ولا النحت سواء الصلصال الزيتي او الطين. زي ما قولت اني سبق قبل كدا اشتغلت بخامات كتيير كان من ضمنها الصلصا . كنت قبل كدا بنحت منه مجسمات. بس دلوقتي  برسم بيه

اما بخصوص المعرض . فأكتر من صديق نصحني بالموضوع ده. واكتر من شخص سأل عن امكانية وجودهم في معرض و امكانية شرائهم. المعرض فعلا فكرت فيه بس لسه شوية

اما بخصوص. الشغل حسب الطلب. فسواء كان الموضوع خاص بالصلصال او اي شئ تاني. قيمة العمل الفني بتكون اعظم للفنان لما يعمله من اجل الفن او الشغف. و الناس تطلب تشتريه اكتر من انه يعمل عمل فني حسب الطلب. و الشخص يشتريه لمجرد انه هو بتاعه او معموله. عامة بينطلب مني طلبات  شخصية . وعادة ما بقبل الطلبات اللي احس انها هتدفعني اني اجرب حاجة جديدة

 

View this post on Instagram

 

A post shared by Ahmed Morshedi (@ahmedmorshedi)

 

س9 : هل تفضل العمل الحر ام في شركة و لماذا ؟

الافضل طبعا العمل الحر حرية في الوقت و البيئة والجو اللى هتشتغل فيه مش مرتبط بمواعيد محددة زي الشغل. ده غير ان طبيعة الاعمال اللي بتشتغل عليها تقدر تقبل الشغل عليها او الرفض غير شغل الشركة اللي بيكون مطلوب منك تعمل حاجة انت ممكن متكونش مقتنع بيها. بس الطبيعي ان الشغل في شركة بيكون موثوق فيه اكتر و الاستقرار اكبر. لان الشغل الحر مش منتظم . اوقات بيكون فيه وفرة واوقات بيكون قليل. عامة انا بفضل الشغل الحر.

س10 : اي من الفنانين الغيرعرب تقوم بمتابعة اعمالهم ؟

متابع لكتير. بس اللي بيشدني اكتر طبيعة الاعمال. بيبهرني الحاجات الجديدة اكتر من اي حاجة. يعني بهتم بالعمل اكتر من صاحب العمل. وبدور دايما على الحاجات الجديدة. والافكار و الخامات الى بتستغل بشكل جديد. مهتم بالافكار اكتر من الاشخاص 

 

س11 : و اخيرا هل من نصيحة تقدمها للفنانين الجدد و ما هي التحديات التي من الممكن تواجهه خاصة في بداية عمله ؟

دور علي شغفك الحاجة اللى لما تعملها بتنسى اي حاجة تانية. الفن و العمل مبحبش اربط ما بينهم. اللى بيحاول يطور فنه علشان همه يلاقي شغل ده بيظلم فنه وبيحصره في مكان معين علشان يقدم حاجة يقدر يشتغل بيها. خلي الفن يوجهك متحطش خطط. جرب. حاول تطلع حاجة تفتخر بيها الاول. اتفرج كتيييير على شغل حلو. الفن هو تجربة شخصية جدا بتاعتك انت. وانت اللي هتكتشفها .اتفرج و جرب. بالتجربة هتكتشف نفسك . هتكتشف انت فين . الفن متربطوش بالشغل. طور نفسك و الشغل هو اللى هيجيلك.

اخيرآ كل اجاباتي بتعبر عن تجربتي الشخصية بس مش لازم تكون صح او غلط بس دي الحاجات اللى انا مؤمن بي ولسه لحد دلوقتي بحاول اكتشف نفسي و بجرب. في الاخر حابب اقول اني نفسي ابعد عن الديجيتال ارت و ارجع اشتغل بشكل يدوي تاني زي زمان لاني بلاقي فيها شغفي اكتر

تابع مرشدي من خلال الروابط التالية FacebookBehance