المصممين و الشهرة

من فترة وصلني رسالة عنوانها ”عاوزه ابقي نجمة في الجرافيك“ الرسالة كانت مليانه بعبارات التبجيل و الاستفسار عن كيفية دخول المجال و الشهرة فيه … الخ. الحقيقة ماخدتش الموضوع بصورة جادة و قلت دي حالة فردية.

لكني استغربت لما احتكيت بالمصممين و خاصة الجدد منهم و شفت هوسهم بموضوع الشهرة ده !! انا بقيت حاسس ان الكل عاوز يبقي عمرو دياب الجرافيك و تامر حسني الـ Photoshop. أنت داخل المجال ده ليه؟ هواية و حابب تمارسها و لا داخل تلم لايكات.

الدنيا مش بتمشي كده محدش بيطلع السلم بالعكس. بستغرب أوي من هوس الشهرة و الانتشار اللي بقي مالي المجال يا جماعة اشتغلوا و حاولوه تفيدوا بعض و الصح و الحقيقي.

و الفنان بجد حيبان مش لازم حك في مصممين اقدم منك و لا تسبيل لمصممات أو اصطناع علم و نظريات أو التقليل من حاجة انت مش فاهمها عشان تبان عميق و فاهم.

أوعي تفكر اني كاتب الكلام اللي فوق ده عشان أنا ضدك أبدا. انا اعتراضي علي القيم المعكوسة علي الطريق اللي عاوز تبدأه من أخره. عارف ان المجال مرتبط ببعض القيم الفضفاضة شوية زي ”الإبداع و الإلهام ….الخ“

اللي بتخلق نوع من المنافسة بسميها ”منافسة العظمة“ لأن كل واحد شايف نفسه فنان أكتر من التاني . قليل أوي اللي بيفكر بروح التكامل في مشروع واحد

او عدم تعالي كل واحد علي التاني. شفت موضوع العظمة ده لما قربت من رسامين الكاريكاتير تقريبا مفيش واحد بيشكر في التاني سمعت عبارات تقليل و اهانة علي ناس شغلهم روعة في نظري.

كل واحد شايف انه ”أله“ في منطقته. و الحمد الله المنطقة دي مش موجودة أوي عند المصممين في منها اه بس مش كتير.

نصيحة خلي شغلك و شغلك بس اللي يتكلم عنك. أعمل شغل كتير لنفسك مش للعملاء.

ركز و بلاش تتعامل انك سوبر مان الجرافيك يعني تخصص بلاش تشتغل 2D, 3D, Logos …. الخ. الانترنت عطي فرص متكافئة للكل خاصة في مجالنا فمفيش عذر. الشهرة حلوة و الصين كمان حلوة بس بلاش تبقي هي شغلك الشاغل خلي شغلك في اكتشاف انماط شغل جديدة قبل ما تكبر و تدخل دايرة الشغل و العملاء تبدأ تكسر أحلامك الوردية.

أنت في فرصة الكتير مننا بيحسدوك عليها و هي عدم الالتزام بشئ لا بمعاد شركة و لا تسليم لعميل استغلها صح قبل ما وقتك يضيع أعمل اللي عليك و بلاش كسل

و ارفع مشاريع علي بيهانس و كفاية حجج من نوع ” شغلي مش أوي، مستني مستوايا يتحسن“ ارفع اللي تقدر ترفعه حينفعك صدقني. و أهم من كل ده أعرف من مش كل مشهور شاطر و مش كل شاطر مشهور.