كيف تصبح مصمم جرافيك. الطريقة المصرية


يضاف الى مجتمع المصممين مصمم جديد يتحول مع الوقت الى اّفه فى الهوية البصرية المصرية بشكل عام – الا من رحم ربى – ومع الوقت ايضا سيتحول الى مسمار يدق فى نعش قيمة المصمم المصرى المادية و المعنوية , الدخلاء على أى مهنة بيكونوا سبب رئيسى فى زعزعة قيمة صاحب المهنة الاصلى و خصوصا فى مهنة زى التصميم لان مفيش عميل مش عايز يوفر فلوس المشكلة دى بتحصل ليه وازاى ونعمل فيها ايه ؟؟

الأسباب :

1. طبعاً قلة الفلوس والشغل فى مصر عامة فتعتبر المهنة منفذ انك ماتشتغلش بياع فى محل واسمك برضه قاعد على مكتب , مع العلم ان فى فئة من الشباب عنده احساس انه موهوب.

2 .مراكز التدريب : فى مصر بتعلمك كيفية استخدام البرنامج و التعرف على ادواته , لكن مش بتعلم الجانب الفنى و يعنى ايه هوية بصرية , بس مؤخرا ظهرت مراكز تدريب بتحاول تغطى المنطقة دي.

3. صاحب الشركة : فى نوعية من اصحاب الشركات عايز المصمم اللى اخره يوم ماتشقلب ياخد 1500 جنية ويبقا طاير مش مهم عنده الموهبة او المهارة المهم ان النحتاية بتاعته ماشيه مابتقفش ويوم لما يزهق من حد فيهم يمشيه ويجيب غيرة 500 زيه و يمكن احسن منه.

4. العميل : مقدرش الومه واحد عايز احسن شغل من وجهة نظرة بأقل تكاليف ومين فينا مش كده فممكن يلاقى ده فى مصممين كتيرو ممكن يكون عايز تصميمم بميزانية محددة فبيدور على حاجة على قد فلوسه وطبعا هيلاقى كتير.

5. المصمم : هو ده اكتر واحد مفترى يعمل تصميم صاحب الشغل يقوله حلو و صحابه يثبتوه بكلمتين خوفاً على مشاعره المرهفة و طبعا الاهل والعشيرة والأصدقاء يغرقوه بالنفاق لرفع المعنويات يروح واقف قدام المرايه ويقول لنفسه : ” انا جامد جدى ” ,ويصم أذنه بعد كده عن أى نقد مستقبلى وإن وجد يعود مهرولاً إلى المنافقين او إلى أحد الجروبات اللى مليانة مجاملات وتثبيت من الأصدقاء ولو تطاول عليه احد هناك بعرض رأية فسيتكفل به شلة الاصدقاء ويعملوا معاه السليمة اتباعا لمبدا ” ظبطنى اظبطك ” ويظل هذا النوع من المصممين فى مكانه من يوم مولدة حتى يوم مماتة كمصمم.

النوع الثاني هو دودة الانترنت وده بيكتشف المواقع اللى يقدر ينزل منها قوالب جاهزة و احيانا تصميمات جاهزة ومجموعة من الخطوط و الفرش لا حصر لها ده مجرد ما تطلب منه تصميمم خلال عشر دقائق يكون مسلمك الشغل والنوع ده طول ما مصادره متاحة هو شغال وفى حاله لكن لا يتقدم ولا يتأخر.

how-to-become-a-graphic-designer-egyptian-way

النوع الثالث ده الحرامى ومش قصدى اللى بيستوحى طريقة او اسلوب لان كلنا بنستوحى من بعض انا قصدى على اللى بيسرق الشغل زى ما هو حتى ساعات من غير مايغير فيه حاجة ومش بعيد يسرق تصميم ويبيعة العديد من المرات وده موجود وبكثره.

الحلول : بهداوه كده لو مقتنع ان كورس الفوتوشوب لوحده يخليك مصمم خد الباب فى ايدك وانت خارج

1. فى حاجة اسمها كلية فنون جميلة او تربية فنية هيدولك كورس جرافيك و خط عربى هتتعلم يعنى ايه تصميم ويعنى ايه جرافيك وده جزء اكاديمي مهم جدا او ممكن مراكز التدريب اللى بتقوم بنفس الكورس.

2. الحاجة التانية عليك وعلى الفرجة الكتيرعلى الانترنت شوف كل انواع التصميمات من كل الدول لو تعرف اتفرج على المصريين اللى عندنا هتنبهر مع الوقت عينيك هتشرب الشغل الحلو اتعلم كمان مصطلحات الشغل ” junior , senior , creative , art director “ اعتقد ان اغب المصممين ميعرفوش ان فى حاجة اسمها كده اصلا مش شرط تبقى مبدع و فنان عشان تشتغل انت ممكن تكون شاطر فى المونتاج او التنفيذ يعنى حافظ البرامج زى ايدك وسريع وبتنفذ المطلوب منك وممكن تكون شغلتك انك تحول فكرة واحد لتصميم.

3. اوعى تبتدى شغلك مصمم حر انزل اشتغل فى مكتب فى أى حته بس لازم تتدعك فى الشغل ولو ببلاش. yellow pages ابعت السى فى بتاعك لكل شركات الدعاية اللى تلاقيها ده لو انت بتدور على شغل يمكن تشبك معاك حاجة .

4. دور على واحد ميكونش بينافقك و حاول تخليه ينقد شغلك behance network على الرغم من انه اتملى نفاق و مجاملات ماسخه لكن فى واحد معين انت بتكون عارفه لو عجبه شغلك انت بتعرف انك عملت شغل كويس وعروض الشغل اللى بتوصلك من خلاله بتديك مؤشر على مستواك. دى يمكن الحلول اللى انا شايفها المعتمدة على المصمم نفسه,و اكيد فى اكتر.. من ناحية اخرى وجود كيان زى نقابة للعاملين بمجال التصميم من خلالها اقدر اوفر تدريبات اساسية ومعاير حاططها محترفين ده هيفيد كل النواحى المصمم أولا وصاحب الشغل ثانياً والعميل طبعا على رأسهم , من ناحية تانية المصممين المحترفين لازم يكوم عندهم خلق اوسع من كده ويحاولوا يساعدوا اكتر دى اغلب الحاجات اللى جايه فى نافوخى دلوقتى وغالبا كده قلت الكلمتين اللى كنت عايز اقولهم .. السلام عليكم

هذة التدوينة كتابة مختار زين

Comments

comments

Powered by Facebook Comments