س1 :عرفنا بنفسك ؟
في البداية برحب بيكم و برحب بالراجل الجميل صاحب المدونة (أ محمد عزت ) اللي بتعجبني دايما مقالاته واللي بيبذل مجهود كبير جدا عشان يفيد الكل . اسمي كريم آدم عندي 26 سنة في الاصل فنان تشكيلي وبشتغل illustrator & graphic designer خريج فنون جميلة اسكندرية ( قسم جرافيك شعبة رسوم نشر ) 2009 عايش حاليا في القاهرة وبشتغل في شركة انتاج فني
س2 :حدثنا اكثر عن بدايتك في هذا المجال و كيف دخلته ؟
البداية جات من أول سنة في الكلية كنت بشتغل جنب الكلية في مجالات مختلفة بس كلهم يندرجوا تحت الجرافيك ف استوديهات تصوير وشركات رسم تيشيرتات وشركات دعاية واعلان صغيرة دة كان طول فترة الكلية ف اسكندرية بعد كدة انتقلت للقاهرة لآن مجال الشغل أوسع وأحسن. اشتغلت في اكتر من شركة دعاية واعلان أوانتاج لحد ما استقريت ف الشركة اللي انا موجود فيها حاليا بالنسبة لتصميم اغلفة الكتب .. بدأت فيها من 2009 كنت وانا صغير بحب اقرا وبحب اغلفة الكتب وجالي فرصة اصمم غلاف كتاب وعملتة كويس الحمد للة وبعدها الموضوع
بدأ لوحدة. ان دور نشر بتطلب اعملها أغلفة وحاجات زي كده
س3 :ما سر تخصصك في مجال تصميم اغلفة الكتب و كيف تري هذا المجال في السوق المصري ؟
حبيت المجال دة و حسيته ممتع مع أنة علي المستوي المادي غير مجدي بالمقارنة بشغل الدعاية والإعلان بس إني أعمل حاجة بحبها في حد ذاتة دة شيء لطيف بغض النظر عن اي حاجة تانية في السوق المصري للأسف مجال تصميم الكتب كان منسي لفترة طويلة وكان اللي بيصمموه دايما ناس سنها كبير و كان تصميماتهم تخاطب نفس الشريحة العمرية بتاعتهم بس الفترة الاخيرة بعد ما بداء النشر ينتشر أكتر وأصبح الموضوع سهل فبقي في شباب كتير بيكتب و بالتالي بقي في شباب كتير بيصمم للموضوعات الجديدة فالموضوع بقي أفضل من الاول من وجهة نظري
س4 :نعلم جميعا ان مع التخصص تظهر مشكلة التكرار او التقليد كيف تتغلب علي هذة المشكلة مع كل تصميم جديد ؟
بالنسبة لي هي كانت مشكلة كبيرة في البداية اني عاوز أعمل هوية بصرية لشغلي بحيث اللي يشوفة يعرف مين اللي صممة و في نفس الوقت التكرار ميخليش الناس تمل وتحس ان مفيش جديد فبدأت أتفرج كتير وعلي أساسه حاولت أجدد في الالوان والافكار بقدر متقارب بحيث يكون الاستايل متقارب حتي و لو كان مختلف تماما بحاول يكون فيه روح شغلي ولو بخطوط خفيفة
س5 :لاحظت تميزك في رسم و تنسيق الخط الحر بل و وضوح انفرادك بخط معين في اعمالك وهي طريقة ناجحة. لكن الا تري انها قصيرة العمر مع تكرارها في عدة اعمال ؟
كان المقصود من تكرارها هو تأكيد هويتي لهذة الخطوط لكن بحاول علي قد ما اقدر في الفترة الأخيرة أغير فيها أو أقدمها بطريقة جديدة ان شاء الله
س6 :ما هي اخر المشاريع التي شاركت في تصميمها و علي اي اساس تقوم بتصميم الغلاف. هل بالقاء بنظرة سريعة علي المادة المكتوبة ام قراءة الكتاب ؟
بالنسبة للمشاريع الجديدة في مجموعة فيديوهات أنفو جرافيكس ودي أول مرة كنت اشتغل بالاستايل دة وبمجرد ما يسمح ليا بنشرها سأقوم بنشرها وأتمني انها تعجبكوا ان شاء الله من المهم اكيد انك تقرا الكتاب قبل ما تصممة عشان كذا نقطة اول حاجة عشان تشوف اللي جوة دة هيعجبك فعلا ولا حاجة زبادي خلاط ثانيا انك تشوف اللي جوة دة بيتماشي مع مبادئك واللي مقتنع بية أو لا ثالتا عشان تقدر تنقل روح الموجود ف الكتاب للغلاف عشان ميكونش غلافك مزيف بس ساعات في حاجات ممكن تخليك تكسر القاعدة دي زي مثلا ان ميكونش في وقت كافي انك تقرا الكتاب وفي الوقت دة بتحاول تتكلم مع الكاتب ويشرحلك هوا كل الموجود ف الكتاب وتبقي أنجزت وقت بس دة متعملوش غير مع كاتب تثق فية وفي كتاباتة
س7 :ما هي اكثر الصعوبات التي تواجهك في هذا المجال ؟
اكثر الصعوبات هي تدني الذوق العالم للأسف ومتهيألي دي المشكلة اللي بتواجهنا كلنا انك بتضظر ف اوقات كتير تمشي ورا كلام العميل عشان تكمل شغلك بص نصيحتي لما تكون مضطر تعمل حاجة زي كدة متنشرهاش خدها علي انها نحتاية وراحت لحالها
س8 :هل من نصيحة تقدمها للمصممين الجدد ؟
اولا ربنا معاهم كلهم. خصوصا ان مهنة مصمم جرافيك دلوقتي موضة جديدة واي حد بينزل فوتوشوب بيقول انا مصمم جرافيك فهيتعبوا شوية عشان يثبتوا انهم مختلفين ويثبتوا نفسهم في وسط كل الزحمة دي. نصيحتي انك تحاول تكون مختلف وجديد علي قد ما تقدر وتفكر برة الصندوق شغلنا دة بيعتمد علي الاختلاف بنسبة 99 % انك تتفرج كتيييير علي قد ما تقدر. الثقافة البصرية دي اللي هتخليك تتقدم وتفضلش واقف مكانك اعمل فولدر جديد وجمع فية كل الشغل اللي يعجبك واكتب اسم صاحب الشغل وادخل تابعة من فترة للتانية حاول ميبقاش شخص بعينة هو اللي بيعجبك شغلة بس شوف اكتر من حد وشوف اكتر حاجة بتعجبك في كل واحد دة الوانة حلوة ودة خطوطة حلوة ودة افكارة مجنونة وجمعهم وابني الاستايل الخاص بك مهم جدا انك تسوق لنفسك إلكترونيا. مش عيب ابدا انك كل شوية تعمل شير لشغلك وتحطة علي مواقع كتير وتهتم بالنقد وبأي تعليق جالك علي شغلك وربنا يوفقكوا جميعا يارب تحياتي 🙂
سعدت بمقابلة هذا الفنان الرائع فاسلوبه الفريد في التصميم دفعني الي طلب هذة المقابلة و لمشاهدة اعمالة علي Behance
