شرفت إمبارح بحضور إجتماع مصممين أسكندرية علي الرغم من اني وصلت متأخر شوية لكني لحقت احصل أكتر من معلومة عن النقاش اللي اغلبه كان التسعير و ازاي انشر شغلي و ازاي اوصل لعملاء …. الخ.
بصراحة الأسئلة دي بتشغل بال أي واحد في المجال خاصة الجدد اللي فاكرين إن في طريق واحد و محدد المعالم كلنا لازم نمشي فيه. مفيش تجربة واحدة قابله للتطبيق علي الكل اللي انا شفته غير اللي غيري شافه.
كلنا مر علينا إحباط و لحظات عدم ثقة في شغلنا و نفسنا و احيانا فشل و و و. اللي عاوز اقوله بعيدا عن الكلام المنمق الجميل اللي ممكن أملأ بيه المقال إن مفيش تجربة و طريق ثابت للنجاح في المجال لكن في إطار عام و عدة نقاط ممكن لو اتبعتها تنجح و ميكونش هدفك بس الوصول لعميل.
و انك تشتغل في شركة كبيرة صدقني هدفك و نظرتك حتتغير كل سنتين او تلاته.
الشباب اتكلمت علي مستوايات الشغل و العملاء المتباينه مثلا زي الشغل في سوق الورق في المنشية او الشغل في مكتب دعاية راقي.
ده موجود و ده موجود و عشان تمر علي العميل الراقي لازم تتعلم في العميل البسيط اللي عاوز كارت و شريط سبوع و دعوة فرح.
فاكرين فيلم أحمد حلمي “جعلتني مجرما” اللي كان شغال فيه مصمم جرافيك و عنده مكتب في مكان شعبي و سامح بيضحك عليه و ياخد منه شغل ب ٢٠٠ جنيه.
تمام فاكرين بقي فيلم “بلبل حيران” لاحمد حلمي برضه اللي فيه مدير استديو و كم الفخامة و الرقي اللي هو بيتعامل معاه يوميا. ده حيفضل موجود و التاني برضه.
بلاش تشغل بالك انت تصلح الصورة العامة للمجال و اننا كلنا لازم نكون شيك و شعرنا طويل و منكوش و لابسين نظارات عشان ندعي اننا مبدعين.
في كده و في كده و لازم نقبل كده ده سوق كبير و التاني سوق اكبر. انت بقي اللي بإيدك تختار انك تشتغل شعبي او تشتغل مع عملاء كبار و كل حاجة فيهم لها ميزه و عيب.
ندخل في المهم !!
ازاي انشر شغلي ؟
عندك بدل الموقع عشرة. حاول تنتشر بتوازن علي مواقع التواصل لو انت مش قادر تشتغل عند حد او عندك ظروف سفر او دراسة او بتحب العمل الحر.
العمل الحر عامل زي الصيد ارمي شبكة محترمة و استني حتلم لك صيد محترم علي قد الشبكة بتعتك ما هي كويسة علي قد ما حتلاقي. اما لو في البداية انصحك انك تنزل تشوف و تتعرف و تتعلم في اي مطبعة او مكتب و حاول مع الوقت انك تنتقل من مكان الي مكان مش صح انك تفضل في مكان كتير خاصة في مجالنا.
شوف شغل غيرك و ثبت اكتر من واحد تابعهم مع الوقت حتعرف تعمل حصيلة شغل ممتازة تقدر تجيب بيها بدل العميل ١٠. الموضوع عاوز شويه وقت بس مجزي في النهاية.
ازاي اجيب عملاء ؟
اوعي تاخد شغلك و تلف بيه علي اي حد. اشتغل علي نفسك و العميل حيجي لك مش لازم من اسكندرية او القاهرة او حتي مصر كلها. الانترنت خلي الدنيا كلها جنب بعض.
ممكن تشتغل مع مصمم اكبر منك سنا و خبرة ممكن تشارك حد في مشروع او حملة اعلانية ممكن يكون مفيش شغل نهائي اقعد ارسم اسامي اخواتك اعمل اي منتج و ارفعه حتكسب خبرة و نقد و يمكن عملاء.
مكان زي معمل اللي رتب لقائنا امبارح بيئة خصبة جدا جدا انك تتعرف علي ناس و تساعد ناس في شغل و تعرض اعمالك فيه. حتلاقي كتير من الشركات اللي ممكن تساعدهم بشغلك.
نصيحة اشتغل علي نفسك كتير قبل ما تفكر في المقابل. شغلك هو المادة الخام بتعتك اهتم بيها جدا حتنفعك بعدين. فكر بره حدود مكانك لو عاوز شغل من اليابان حيجي لك بس انت فكر و أومن بفكرتك و ركز فيها.
كلمة اخيرة. بالنسبة للاتفاق مع العميل اي كان نوع شغلك او جودته لازم تاخد عربون لازززززم. الاتفاق بلاش يكون شفوي لازم يكون مكتوب.
و مع اي خلاف بينك و بينه بلاش تروح تشتكي و تكتب علي النت اللايكات و الشير مش حتعلمك حاجة خلي ده اجراء اخير بالنسبة ليك. عشان العميل اللي بعده لو شاف التصرف ده منك حيخاف يتعامل معاك حتي لو كنت فان جوخ.
