إزاي تبدا تشتغل !!

كتابة : مختار زين

ازاي تبدا تشتغل … هكتب من تجربتي الشخصية اللي ممكن تنفع او متنفعش مع ناس كتير، اول حاجة تقرر عايز تشتغل ايه ؟ رسام طباخ ، لعيب كورة ، نجار . اي حاجة.

لازم تبقي عارف الشغلانة دي بتشتغلها فين يعني مثلا رسام فلازم تعرف الرسامين بيشتغلوا فين. جرايد بيرسموا كاريكاتير و مجلات اطفال بيرسموا كوميكس استوديوهات بيرسموا ستوري بورد و كونسبت ارت، وقيس علي شغلانة تانية نجار مثلا المعلومات دي كل ما تجمعها كل ما هتبقي أسهل في أنك تلاقي شغل والمعلومات دي كمان لازم تعرف ازاي تجمعها يعني تكلم ناس عندها خبرة في المجالات دي أو تدور علي النت او أي طريقة المهم يبقي عندك المعلومات دي بعد كده لومات تدخل علي العلاقات يعني تعرف ازاي توصل للشركات دي عندك ايميلاتهم مثلا وتتابع صفحات السوشيال ميديا بتاعتهم لو تعرف حد شغال فيهم.

بعد كده تسال نفسك ايه اللي يخليني أنفع في الشغلانة دي والإجابة انك يا دوب لازم تعرف الأساسيات تاخد كورس بقي تذاكر علي النت تتعلم من حد شوف الطريقة اللي يريحك.

بعد كده السي في او البورتفوليوا وده اهم حاجة في الليلة دي كلها وده المفروض تظهر فيه مهاراتك حتي لو لسه ابيض يا ورد يعني لو نجار مثلا هتورينا كل حاجة انت عملتها من ساعة لما بدات تتعلم ولتلمع الحاجة كده وتخلي شكلها حلو قدر الامكان نفس الكلام لو لعيب كورة تعمل فيديو لنفسك وانت بتستلم وتسلم وتشوط وتلعب دفاع وهجوم حتي لو مع صحابك في الشارع لا ن اللي هيشوف ويقيم غالبا بيبقي فاهم فانت عايز تبيعله وثانيا لما هتحط حاجة حتي لو انت مش شايفها مية مية ممكن اللي يقيم يشوفها ييجي منك بس قدام مع شوية خبرة وطول ما انت عايش افضل طور وظبط في السي في موديل الموبايل بيتطور كل سنة عشان يعرف يبيع فانت كمان لازم تتطور كل يوم عشان تعرف تبيع.

بعد كده تبعت السي في او البورتفوليو او الشو ريل لكل الاماكن اللي انت عايز تشتغل معاهم ودول انت المفروض مجمع معلومات عنهم من الاول وتكلم صحابك اللي ليهم علاقات يقدروا يساعدوك في انك توصل السي في او انك تلاقي مكان ولو محدش رد عليك اعرف ان العيب في حاجة من اتنين يا انت لسه محتاج تطور مستواك شوية وتتعلم اكتر شوية او مش عارف تسوق لنفسك او تعمل سي في كويس و وحياة ابوك خايك صريح مع نفسك.

في المرحلة دي انت بتدور علي خبرة او تتعلم الصنعة مش بتدور علي فلوس نهائي ولو حتي هتخسر فلوس مش مهم المهم تاخد خبرة ودي هي اللي بتجيب فلوس قدام وافتكر دايما ابو تريكة والحضري واغلب لعيبة الكورة بيبدأو فين وبكام.

لو وصلت انك في مكان صغير وبتاخد خبرة وحسيت انك بطلت تتعلم جديد امشي ودور علي مكان يديلك خبرة اكتر يعني دايما اجري ورا الخبرة والفلوس هتيجي وراها.

نصيحة في الفرى لانس للناس اللى مش عارفة انا شغال بقالى تقريبا خمس سنين من البيت.

من شهرين كده قلت اجرب طريقة جديدة وهى ان كل ما ييجى شغل اقبله واجرب واشتغل كله في وقت واحد واشوف هيحصل ايه في الحقيقة هي تجربة فاشلة وبداية سكة اى حد عايز يبطل فرى لانس حقول طريقى يمكن تفيد اى حد.

1- قسم وقتك كويس جدا لما يكلمك كلاينت قوله انا هشتغل معاك من يوم كذا ليوم كذا حتى لو اليوم ده بعيد او حتى بعيد جدا.

2- أدى نفسك وقت للشغل مستريح يعنى انت عارف انك هتخلص في أسبوع مثلا قول أسبوع ونص او أسبوعين عشان لو اتاخرت يبقى متاخرتش على العميل ولو خلصت بدرى يبقى كويس جدا.

3- احسب فلوسك كويس واتفق على رقم متغيروش.

4- اوعى تخسر عميل او تعديه بتجربة سيئة معاك حتى لو هتيجى على نفسك او على فلوسك حتى لو هتعتذر عن شغل اعتذر بأفضل طريقة ممكنة وياريت لو هتعتذر اعتذر بدرى جدا.

5- الشغل المستعجل هو انك تكون انت مستعجل مش العميل لو العميل مستعجل ارفض الشغل غالبا هتلاقيه بقى مش مستعجل او هتوفر على نفسك ضغط عصبى ووجع قولون.

6- الطريقة اللى تخلى عندك شغل فرىلانس هو العميل المبسوط المرتاح وده بيبقى متعامل بفلوس معقولة ومعاملة محترمة في كل الظروف وواخد حاجته في ميعاده وده يخليه يوصى بالتعامل معاك في اى حتة ودى تحتيها 150 خط لانها بتضمن استمرارك.

7- الطريقة التانية انك تنشر شغلك في كل حتة حتة لو شغلك مش احلى حاجة في العالم حتى لو سكتشات بس او شغل مش مكتمل طول ما شغلك متشاف كويس في كل حتة اللى هييجى يدور هيلاقيك بسهولة ارمى شغلك زى اللى بيحدفوا كروت في العربيات.

8- ازاى تحسب فلوسك ده موضوع عايم جدا جدا بس في مجالى في حاجات شبه ثابتة او قريبة من بعض المهم انا في الأول كنت باخد رقم اقل من السوق بشوية وبعدين نفس الرقم ده في الحاجات الثابتة حتى لو جالى زبون فلوسة كتير او حجمه كبير انا ارقامى ثابتة.

والحاجات اللى تسعيرتها عايمة بحسب الشغلانة هتاخد وقت قد وانا عايز اكسب قد ايه في الوقت ده يعنى في اليوم انا عايز اكسب جنية وجاتلى شغلانة بنص جنية بس هتاخد ساعتين بالكتير بوافق ويبقى عندى باقى اليوم استنى النص جنية التانى لكن لو هتاخد وقت اكتر من كده يبقى انا كده ضيعت يومى بخسارة فمبشتغلش من البداية.

حاجة انا بعملها عشان التعديلات ممكن متنفعش مع ناس تانية بس هي نافعة معايا انا برسم سكتش و اتنين وتلاتة لو وافقت عليه يبقى اشتريت هتغير بعد ما وافقت وانا بدات شغل يبقى شغل جديد او رسمة جديدة وبتفق على ده من البداية خالص.

حاجة كمان عايز ازودها اوعى تقول للعميل مهما حصل اصل وفصل ومعلش والجو ده او تدى اعذار انك اتاخرت واصل امى تعبانة وبنتى في المستشفى وصباع رجلى الصغير خبط في رجل السرير العميل مالوش دعوة بالحاجات دى حتى لو العميل ده اخوك انت اتاخرت اعتذر.