ازاي تسرق لوجو و يعجب العميل !!


كنت قاعد من يومين مع أحد الاصدقاء و قدامي علي الطاولة لوجو انا شاكك في امره، عجبني بس مش عجبني حلو بس مش حلو. حاسس ان فيه حاجة غلط او مش مرتاح مع ان اللوجو ممتاز و موزون و صعب الانتقاد و يحتوي علي كل المكونات اللي اي مصمم بيدور عليها و اي عميل يحلم بيها. بس برضه انا مش مرتاح.

المهم خلصت القعدة و روحت البيت و اللوجو قدامي برضه. اللي خلاني افكر اكتر في أمر اللوجو ده هو صاحب اللوجو أقصد اللي عمله و اللى اتعمله له اللوجو. الاثنين تقريبا اعرفهم و خاصة مصمم اللوجو حاسس انه مش ده شغله مش موده مش طريقته في الشغل و اصلا مش أيقون لوجو ده ايقون اي حد بتاع ويب يفرح بيه و يستخدمه في تبويب صفحة ما. المهم قررت ادور ورا الموضوع ده و للاسف بعد ٣ ساعات من البحث اكتشفت ان اللوجو مسروق و متأخد نسخة طبق الأصل من شغل فنان تقريبا صيني.

فكرت كتير أعمل ايه أعمل ايه !! اقول لصديقي اللي صممه و احرجه و اللي غالبا حينكر و يدعي توارد الافكار و الاشكال و الارواح و لا اقول للعميل صاحب اللي اشتري اللوجو و دفع فيه مبلغ و قدره. بعد تفكير أقريت إني لو اتكلمت حسبب ضرر فقررت اسيب اللي فرحان فرحان و اسيب الحرامي اللي فاكر نفسه فنان و لا افضح حد و لا اشهر بحد. عشان المفضوحين كتير مش عاوزين نزودهم واحد.

بس قررت اقول شوية نصايح للأخوة المصممين عشان لما تسرق لوجو المرة اللي جاية تعرف تسرقه صح :

١- لازم تعرف ان زي ما الانترنت مورد هائل للأفكار هو برضه مكان كاشف للأصول. بمعني انك لما تسرق او تقتبس عمل غيرك و ترجع ترفعه تاني بعد شهر أو سنة حيبان و حتتقفش و شكلها ساعتها شكلك حيبقي وحش.

٢- بعد ما تاخد شغل غيرك و تعدل فيه و ترجع تقدمه للعميل في برزنتشين. للأسف الغرور بياخدك و تفرح بنفسك و تفتكر للحظة انك مبدع العمل ده و تنسي انك كنت قاعد بتعيط قدام الجهاز و تدور يمين و شمال علي اي ايقون تلزقها و تبعتها للعميل قبل الديدلاين. فبلاش تنسي انك سارقها و تصدق انك فنان.

٣- أنا دايما انصح أي مصمم بيبدأ شغله انه يقلد كتير و يشوف اكتر بس عمري ما قلت انه يرجع يبيع اللي بيقلده. حقيقي مش لاقي كلام اقوله عن حد بقاله اكتر من ١٠ سنين شغال و لسه بيسرق.

٤- لما تسرق حاول تعدل كتير لدرجة انك تخفي ملامح الأصل مش تغير ألوان الأيقون و العناصر اللي قدامك و خلاص كده .. غير النسب التوزيع اقلبها من فوق لتحت.

٥- بلاش تسرق شغل حد معروف سواء بره او جوه عشان حنعرف حنعرف ده واحد معروف و عدد الزيارات اللي علي صفحته اكيد عالي فمكن ربنا يرزقك بحد زيي فضولي و يدور وراك و يفضحك.

٦- لما تتفضح بلاش تكابر و تقول ده توارد و هبل من النوع ده. في كدبة احلي اسمها ”الترند“ بس ده في حالة عدم تطابق الشكل.

٧- منعا للقيل و القال اسرق في صمت يا ولدي. يعني بلاش ترفع شغلك الي انت سارقه علي النت و تدور علي لايكات و تعليقات ترضي غرورك و تصطاد بيها عميل جديد.

٨- التقليد مش عيب خاصة لو بنبدأ بس العيب انك تتربح من شغل غيرك و تقلد و تبيع و تكسب و كمان تدعي الفن.

Comments

comments

Powered by Facebook Comments

+ There are no comments

Add yours

Solve this equation to add your comment * Time limit is exhausted. Please reload CAPTCHA.