مقابلة مع المصمم / اسلام زايد


Islam Zayed تابعت الكثير من المشاريع له منذ عنده اشهر و بالرغم من تميزه و اختلافه لم اجد له نشاط كبير يذكر علي مواقع التواصل الاجتماعي عدا بعض المشاريع علي  Behance زايد هو مصمم مصري دارس بالجامعة الأمريكية بالقاهرة لذا من الواضح في اعماله عدم النمطية المعتادة التي نشاهدها في المشاريع التجارية

س1 : اسلام عرفنا بنفسك ؟

إسلام اسامة زايد. خريج  الجامعة الامريكية بالقاهرة سنة ٢٠٠٨. بحب الفن و بشتغل مصمم حر بقالي كذا سنة

س2 : حدثنا عن بدايتك بالاضافة الي مسارك المهني ؟

اكتشفت موضوع الجرافيكس ديزاين و عمري ١٧ سنة. شفت كام موقع كان الفنانين فيه بيعرضو أعمالهم و عجبني الموضوع. بعديها دخلت على مواقع تدريب و قعدت اقرأ مقالات عن إستخدام الفوتوشوب لحد ما تمكنت منه. بعديها ابتدت اشتغل و أنا طالب مع كذا ستديو و كذا شخص. كنت فاكر ساعتها إن حشتغل في مجال الدعاية والإعلان بس الموضوع معجبنيش و قررت اركز في تصميم الجرافيكس نفسه. سافرت ماليزيا و قعدت هناك فترة و بعدين رحت دبي بس مطولتش قوي هناك و رجعت مصر و عزمت على الشغل الحر.

س3 : لاحظت تنوع اعمالك المعروضة في صفحتك الخاصة. بما تصنف نفسك كمصمم ؟

عادةً احاول التنويع في اعمالي قدر الامكان بحب اكتشف تكنيكات و انماط جديدة و انفذها في شغلي. مابحبش أفضل أعمل نفس الحاجة علطول عشان بحس إن الموضوع بقى روتيني جدا.

Coca Cola & Meals 1Coca Cola & Meals2

س4 : هل تفضل العمل الحر ام العمل بشركة و لماذا ؟

شخصياً أنا أفضل العمل الحر. لأسباب كتير منها حرية المواعيد، إنت إلي بتنظم نفسك و تعاملك مع العميل عادةً بيكون مباشر أكتر من شركة. ده بالإضافة إلى إن العميل بيبقى جيلك إنت مخصوص عشان هو شاف شغلك و عجبه. عشان كده جودة شغلك مش هتتأثر بل بالعكس ممكن تلاقي نفسك بتعمل شغل أحسن.

س5 : برأيك ما يميز شبكة “Behance” عن شبكات عرض الاعمال الفنية الاخري مثل “Deviantart” و غيرها ؟

بيهانس بالنسبالي شبكة محترفة جداً من ناحية عرض الأعمال و جودتها. أحسن مصممين و فنانين فالعالم موجودين على بيهانس. و دة بيخلي الشغل إلي بتشوفه ديماً  ممتاز.

س6 : لاحظت من سيرتك الذاتية انك عملت في كل من الامارات، ماليزيا حدثنا عن تجربتك هناك و ما الفرق بين العمل في وكالة اعلانية بمصر و خارجها ؟

ماليزيا الشغل فيها كان مهلك جداً بسبب إن المصمم هناك بيمسك الشغل من أوله لأخره. على سبيل المثل عادةً في مصر تلاقي إن في ناس اسمهم “finalizers” شغلتهم انهم يقفلو الشغل و يتأكدو إنه جاهز للطباعة و ده في حد ذاته شغل كتير. في ماليزيا مفيش الكلام دة..إنت المسؤول عن كل حاجة فالتصميم لغاية ميتسلم للعميل. أما بالنسبة لدبي فالوضع ميختلفش كتير عن مصر. ساعة العمل ممكن تبقى أكتر شوية بس برده في شركات في مصر عادي جداً فيهم الشغل لفترة طويلة.

Islam Zayed work

س7 : ما مدي فعالية بيع منتجات فنية اونلاين و هل هي مجدية ؟

مجدية جداً لو تعرف تعمل جمهور ليك. مجال بيع الأعمال اونلاين مجال صعب جداً و فيه ناس كتيرة جداً بتعمله. فعشان تعرف تبيع كويس لازم تشوف ازاي تخلي أكبر عدد ممكن من الناس تشوف أعمالك و تسعرها بشكل يخلي ناس كتير تشتري منك.

س8 : اغلب المصممين يسألونني عن كيفية التسعير و علي اي اسس تقوم. هل من نصيحة لنا بخصوص هذا الشأن ؟

عادةً أنا بقيم نوع الشغل المطلوب من ناحية الوقت المتاح وحجم المشروع ، و بعدين بشوف سعر السوق عمل اه و إذا كان ده بيتماشى مع نوع الجودة إلي هقدمه للعميل.

Islam Zayed work 2Islam Zayed work

س9 : ما رايك بمسابقات التصميم خاصة الشعارات. ان وجدت واحدة هل تشارك بها ام لا و لماذا ؟

هي كويسة على حسب مين إلي عامل المسابقة. بس ساعات تلاقي ناس بتعمل مسابقات عشان مش عاوزين يدفعو لمصمم و عاوزين يشوفو شغل كتير و يدفع تمن أقل بكتير جداً فيه وده شئ أنا شخصياً مبحبوش. أنا عادةً مش بشارك في مسابقات.

س10 : هل من نصيحة لرواد المجال الجدد ؟

حب إلي إنت بتعمله جدا. و خليك عارف إن ديماً فيه حاجات كتيرة هتتعلمها مهما كبرت في مركزك أو خبرتك. و دي أحسن حاجة فالفن إن ملوش أخر. 

للتواصل و مشاهدة اعمال اسلام زايد اضغط هنا

Comments

comments

Powered by Facebook Comments

+ There are no comments

Add yours

Solve this equation to add your comment * Time limit is exhausted. Please reload CAPTCHA.